ჭავჭავაძის სასახლის მუზეუმი

ჭავჭავაძეების სასახლე წინანდალში 1886 წელს აშენდა. თავდაპირველად, ის გარსევან ჭავჭავაძეს ეკუთვნოდა, რომელიც მეფე ერეკლე II-ის მეფობის დროს რუსეთში საქართველოს საგანგებო და სრულუფლებიანი ელჩი იყო. მოგვიანებით, მისი სასახლე მის ერთადერთ ვაჟს, ალექსანდრე ჭავჭავაძეს გადაეცა. ალექსანდრემ მემკვიდრეობით მიღებული სასახლე კულტურული ღონისძიებების ცენტრად აქცია. მალე ის XIX საუკუნის მრავალი ცნობილი საზოგადო მოღვაწის, მწერლისა და პოეტის საყვარელ შეკრების ადგილად იქცა, მათ შორის ალექსანდრე დიუმას, მარი-ფელისიტი ბროსეს, ალექსანდრე პუშკინის, მიხეილ ლერმონტოვის, გრიგოლ ორბელიანის, ვახტანგ ორბელიანის, გიორგი ერისთავის, ალექსანდრე გრიბოედოვის და ნიკოლოზ ბარათაშვილის. სტუმრებმა წინანდლის მამულს „პოეტებისა და მწერლების ლიტერატურული გული“ უწოდეს. ქართული თეატრის დაარსების იდეა აქ კულტურის დიდების ერთ-ერთი ასეთი შეხვედრის დროს გაჩნდა.

2007 წლიდან „სილკროუდ ჯგუფმა“ ჭავჭავაძის სახლ-მუზეუმის რეაბილიტაციაში 12 მილიონ აშშ დოლარზე მეტი ინვესტიცია ჩადო. შედეგად, დროთა განმავლობაში დაზიანებული სასახლე სრულად გარემონტდა, მუზეუმში დაცულ 100-ზე მეტ უნიკალურ ექსპონატს სრული რესტავრაცია ჩაუტარდა, ხოლო მუზეუმის ფონდი 500-ზე მეტი ექსპონატით გამდიდრდა.

ალექსანდრე ჭავჭავაძის სახლ-მუზეუმში ამჟამად წარმოდგენილია ჭავჭავაძის ოჯახის წევრების პირადი ნივთები, XIX საუკუნის სხვადასხვა ლიტერატურული გამოცემები, XVIII საუკუნის ხელნაწერები, დიმიტრი ერმაკოვის ფოტოები, ნახატები და ლითოგრაფიული ნამუშევრები, ასევე ქართული, რუსული, ფრანგული ავეჯი და XVIII-XIX საუკუნეების სხვა საყოფაცხოვრებო ნივთები. მუზეუმის ექსპოზიციაში განსაკუთრებული ადგილი უჭირავს როიალს, ჩინურ, იაპონურ, ევროპულ, ქართულ და რუსულ ჭურჭელს.

ამჟამად ჭავჭავაძის სახლ-მუზეუმის ხელმძღვანელის თანამდებობას ალექსანდრე ჭავჭავაძის შთამომავალი მაია კოკოჩაშვილი იკავებს.